မထိုက်သူကို မောင်းထုတ်ပြီး ထိုက်သူပိုင်ရှင်ကို စောင့်လို့ ကိုယ်ထင်ပြခဲ့တဲ့ ကျောက်စိမ်းတုံးကြီး…

ဒီ တခါ တော့ ကျောက်စိမ်းတလုံးဟာ အချိန်မတန်ပဲ ရကိုမရဘူးဆိုတာလေး ပြောပြချင်မိတယ်။

ကျွန်တော်တယောက်ဇာတ်လမ်းပေါင်း များစွာရှိတဲ့ စော်ဘွားချောင်လုပ်ကွက်ကနေ ညောင်ကိုးပင် ကို ပြောင်းရွှေ့ခဲ့တာသိပြီး ကြမှာပါ( စာစဉ် 3 တွင်ရှု )

ညောင်ကိုးပင်ရောက်တော့ ကျွန်တော်တို့တဲက ထိပ်ဆုံးမှာဗျ မြင်အောင်ပြောရရင် ဝှေခါနဲ့တာမခံသွားတဲ့ တောလမ်းလေးဘေးမှာ။ တောင်ထိပ်မရောက်တရောက်မှာပေါ့ဗျ

လုပ်ကွက်တွေ အားလုံးကို အပေါ်ကနေကြည်လို့ရတယ် အဲဒီအချိန်က တာမခံလမ်းက ကားသွားလို့မရသေးဘူး အဲဒီလမ်းကားသွားလို့ ရအောင် ကျွန်တော်တို့ ဖောက်ခဲ့တာ မှော်သစ်ကုန်းက ရှိသမျကျင်းတွေတစ်လတိတိနားပြီး ဖောက်ပေးခဲ့ရတာဗျ။

ကျင်း တကျင်းကို လမ်းပေဘယ်လောက်လည်းမမှတ်မိတော့ဘူး ကိုယ့်ကျင်းအဖွဲ့ ရဲ့ သတ်မှတ်နေရာကိုမဲနှိုက်ပြီး ဖောက်ရတာ တော်တော်ပင်ပန်းတယ်။ သစ်ပင် ပေါတဲ့နေရာရတဲ့အဖွဲ့က တော်တော် အဆင်ပြေတယ် အပင်တွေကို ဖြတ်လဲဲပြီး နားချိန်မှာထင်းခွဲရောင်းတာ အမယ် အရက်ဖိုး တင်မက ဘိန်းဖိုးပါရကြသဗျ။

ကျောက်ဆောင်ကျောက်တုံး နေရာကျတဲ့အဖွဲ့တော့ သွားရောပဲ ဒီတနေရာကို ဘယ်နှရက်နဲ့အပြီး လို့သတ်မှတ်ထားတာဆိုတော့ မပြီးပြီးအောင် လုပ်ကြရတာ မပြီးတဲ့အဖွဲ့က မှော်ထဲ ကျင်းဆင်းခွင့်မရဘူး တနေရာထဲလည်းမဟုတ်ဘူး တနေရာပြီး နောက်တနေရာနဲ့ တလပြည့်အောင်လုပ်ရတာဗျ

ကျွန်တော်တို့လောပန်းက မှော်သစ်ကုန်းအဝင် လမ်းအောက်ဘက်အခြမ်းမှာ လက်ဖက်ရည်ဆိုင်နဲ့ ဗွီဒီယိုရုံ ဖွင့်တယ် ဆိုင်နံမည်က ရီဖန်း လောပန်း နံမည်က တာဖ သူ့အမျိုးသမီးက ဒေါ်ဝါနု နပ်စမဗျ ဆေးခန်းလည်းဖွင့်တယ် ကျွန်တော်တို့ကိုတော်တော်ချစ်ရှာပါတယ် အမေတယောက်လိုပါပဲ နှာစေးချောင်းဆိုးကိုအဖြစ်မခံဘူး တန်းကုပေးတယ်

ဆရာမတင်သဘောကောင်းတာလားဆိုဘယ်ဟုတ်မလည်း လောပန်း ကလည်းကောင်းတယ် တပတ်ကိုဆန်လေးပြည်လို့သာပြောတာ အိတ်လိုက်ဝယ်ပေးတယ် ဆန်ကောင်းဗျ ကုန်ပြီလို့သာပြော တန်းရောက်လာတာ အသားဆို တပတ်သုံးရက်လောက် ဝယ်ပို့တယ် ကျွန်တော်တို့ရတဲ့ ရိက္ခာ ငွေလေးရာက အပိုပဲ အရက်သောက်မလား ဘိန်းရှူမလား ကြိုက်တာလုပ်ဘာမှမပြောဘူး တခါတလေ စျေးတန်း ဆင်းလို့ဆိုင်နားရောက်ရင် လဘက်ရည် ကအလကားသောက်ရသေးတယ်

အားလုံးအဆင်ပြေတယ် မပြေတာကကျောက်မရတာပဲ။ဒီလိုနဲ့ မိုးဝင်လာ ခဲ့တယ် ခေါင်းပေါင်ကျင်းပြီးသားတွေကလည်း တနွေလုံးထိုးပြီးလို့ကုန်ပြီ ကျောက်ဆိုလို့ မျိုးလေး တွေပဲရတယ် ကျောက်ကောင်း ကြက်မတဝပ် ဆိုပြီး တူးလိုက်တာ ပေငါးဆယ်ကျော်တဲ့ကျောက်ကျောခုံ ကြီးပဲကုန်သွားတယ် ဘယ်မှာလဲ ကျောက်စိမ်း ဘယ်ရောက်နေလဲပေါ့

မိုးဝင်တော့ မိုးတွင်းထုံးစံအတိုင်း မျောတိုက်ရတော့မယ် မှူန်ကန်ကလည်းရှိပြီးသားမျောကြောင်းကလည်းရှိပြီးသား ဆိုတော့ ရေပေးတဲ့ ကော်မတီ ကသတ်မှတ်တဲ့အချိန် ထပြီးမျောတိုက်လိုက် ရုံပဲ မျောတိုက်တာက တခါတလေအိပ်ရေးပျက်တာကလွဲပြီး သက်သာပါတယ် မသက်သာတာက သဲဝဲစားတာ တော်တော်ဆိုးပါတယ်ဗျ

ာ ရေကတောင်ကျရေကို ကော်မတီက ကန်အကြီးနဲ့လှောင်ပြီး ကျင်းတွေကိုပေးတာ တောင်ကျရေဆိုတော့ ဆင်ချေးတွေ ဖက်ပုပ်တွေ နဲ့လေ ၊ဝဲ ကတော့ဘာစားသလဲမမေးနဲ့ ကျွန်တော်တို့ တဲမှာခြောက်ယောက်ရှိတာ တယောက်မှ ထမင်းထမချက်နိုင်ဘူး လောပန်း အိမ်က လူယုံကလာချက်ကျွေးရတဲ့အထိပဲ။

မျှောလေးရသလောက်တိုက်ပြီး ကျောက်ကျောထိုးကြတယ် ကျင်းခေါင်းက အရင်ကပြောဖူးတဲ့ ကိုနိုင် ကျွန်တော်နဲ့တရပ်ကွက်တည်း သူ့ညီ သဲမောင်နဲ့ကကျွန်တော်နဲ့သူငယ်ချင်း ကိုနိုင်က မှော်ထဲမှာ အဲဒီတုန်းက ကို ခုနှစ်နှစ်ရှိပြီကျောက်မရသေး။ ကျွန်တော် လည်းနှစ်နှစ်ကျော်လောက်ထင်တယ် စော်ဘွားချောင်တုန်းက သူက ကျင်းသုံး ကျွန်တော် က ကျင်းတစ် တဆောင် ထည်းနေလာတာ ဒီရောက်တော့သူက ကျွန်တော့်ကို သူ့ညီအရင်းလိုပဲ

အလိုလည်းလိုက်တယ် အဲဒီခေတ်က ကျင်းခေါင်းဆို အကောင်ပဲ ကျင်းခေါင်းနဲ့ပိုင်တဲ့ကောင်ဆိုအနေစား အတော်ချောင်တာ ဘယ်ကောင် ဒီနေ့ကျင်းဆင်းမယ် ဘယ်ကောင် ထမင်းချက်မယ် ဆိုတာ ကျင်းခေါင်းကပဲဆုံးဖြတ်ပိုင်ခွင့်ရှိတယ်။ရိက္ခာငွေဆိုလည်း သူပဲစီမံတာ ဒီတပတ်ဘာဝယ်မယ် ဘယ်လောက်ဖိုးဝယ်မယ် သူပဲလုပ်တာ ငွေပိုရင်လည်း သူပေးသလောက်ပဲရတာဗျ

တဲမှာ ကျွန်တော် ကအငယ်ဆုံး ကျင်းခေါင်း သူ့ညီပြောထားတော့ ဘယ်သူမှမထိရဲဘူး ကျင်းမသွားချင်ရင် အရက်မှူးအောင်သောက် ပြီးသောင်ကျန်းပလိုက်တယ် ဘယ်ရမလဲ ကျွန်တော် လည်းအကောင်ပဲ ပိုဆိုးတာက လောပန်းမိန်းမ ဆရာမကလည်း ကျွန်တော့်ကို သူ့သားအရင်းလိုချစ် တာ ဖျားချင်ယောင်ဆောင်ပြီး ဆေးခန်းသွားပြ ရင်လည်းဘာမှမပြောဘူး မှုန့်ဖိုးဆိုပြီးပေးသေးတယ်။

ဒီလိုနဲ့ ကျွန်တော် တို့အဖွဲ့ ကျောက်မရ ပဲ တရာသီကုန် ပြီး နောက်တရာသီ ဆက်ကြတယ် အောက်ကျောက ကျောက်ကျဲ တယ်တဲ့ လောပန်းက ကြက်ခေါင်းကြည့်တတ်တယ် ကြက်ဖို ကြက်မနဲ့ကျင်းနတ်တင်ပြီးကြည်တာ ကျင်းခေါင်းကိုပဲခေါ်ပြီးတိုးတိုးတိတ်တိတ် ခေါ်ပြောတာ မင်းတို့ ဒီနှစ်တော့ ကျောက်ရတော့မယ် အပေါ်ခုံတက်တူး ရန်တွေလည်း ဖြစ်လိမ့်မယ် သတိထားလို့ပြောလိုက်တယ် ကျွန်တော်က ကျင်းခေါင်း လူဆိုတော့ သူကပြန်ပြောပြတယ် သူများတွေမသိဘူး မပြောရဘူး ပြောရင် ကျောက် ပြောင်းသွားတတ်တယ်ပြောတာပဲဗျ။

အဲဒါနဲ့ အပေါ်တက်တူးရော ဆိုပါတော့ လောပန်းက တကျင်းပဲထောင်ပေမယ့်နှစ်နေရာယူထား တာ အရင်နှစ်က အောက်ကျောတူးတဲ့ကျင်းနဲ့ ခုနှစ် အပေါ်ကျောတူးတဲ့ကျင်းကတဆက်တည်း အပေါ်ကျောဆို ကိုယ်တွေအကြိုက်ပေါ့ ကော်တောင်းလည်း အဝေးကြီးမထမ်းရတော့ဘူး သံဒိုင်လည်း သိပ်အားမစိုက်ရဘူး မြေမှန်ထက် နဲနဲ ပဲပိုမာတာဆိုတော့ အေးဆေးပဲ

အပေါ်တက်တူး တော့ မိုးတွင်းမျောတိုက် တုန်းက မျောကြောင်း အတိုင်းတူးဖြစ်တယ် ကျင်းထိတ်ကမျောကြောင်းနှတ်ခမ်းမှာ ဘိုင်ပင်ပေါက် တပင်ရှိနေတယ် သူ့နောက်မှာ ခေါင်းပေါင်းတွေက များကြီးဗျ။

အဲဒီလို တူးရင်းနဲ့ ဘိုင်ပင်ပေါက်နားရောက်လာလေ တဲမှာ နေတိုင်းလိုရန်ဖြစ် ကြတယ် ထူးတော့ထူးတယ်ဗျ အရင်ကလည်း မအေတွေနှမတွေ ဆဲကြ တောင်းကြ ဘာမှ မဖြစ်ဘူး အခုဆို တယောက်နဲ့တယောက်ဘာမဟုတ်တာလေးနဲ့ ရန်ဖြစ်ကြပြီ ကျွန်တော်ကသိနေပြီးသားဆိုတော့ ပျော်ပြီလေ ကျောက်ကမဝေးတော့ဘူး

အရင်ကဆို သူများထလို့ထမင်းစားပြီးတာတောင် မထတဲ့ကောင်က အစောကြီးထ ထမင်းတွေဘာတွေချက် ဝီရိယတွေကောင်းလာခဲ့တယ် တဲကကောင်တွေနဲ့လဲ ပြဿနာမဖြစ်အောင်ရှောင်နေရတယ် ဒါတောင်မှဒီကောင်တွေက လူကို လာငြိနေသေးတယ် ဘာရမလဲ အေးပါကွာ လို့လုပ်လိုက်ရင်ပြီးရောပေါ့။

တူးရင်းတူးရင်း ဘိုင်ပင်ပေါက် နားရောက်တော့ ကျွန်တော် ခေါင်းပေါက်တယ် ဘိုင်ပင်ခြေရင်းကနေ ကျောက်ခဲပြုတ်ကျတာ နမိတ်ပြတာဖြစ်မှာပေါ့ ကျောက်ခဲကသေးလို့ လေးချက်ချုပ်လိုက်ရတယ်။ဆရာမဆို မျက်ရည်တွေဝဲလို့ ငါ့သားလေးကို ကျင်းပေးမဆင်းနဲ့ နားပါစေတဲ့ လောပန်းကလည်း ကျွန်တော့ကိုကျင်းပေးမဆင်းတော့ဘူး ကျင်းသားတွေကလည်း သဘောတူတယ် အနာပျောက်တဲ့အထိ နားခွင့်ရတယ် ဆရာမကဆေးခန်းမှာပဲခေါ်ထားလို့တဲမပြန်ရဘူး။

မကြာပါဘူး တဲမှာ ရန်တွေဖြစ်လို့ လူနှစ်ယောက်ထွက်သွားတယ် ရှိတာမှ ခြောက်ယောက်ပါဆို ကျွန်တော်ကနား နှစ်ယောက်ကထွက်ဆိုတော့ လူမရှိတော့ဘူး ကျင်းပြန်ဆင်းတော့မယ် ဆိုတော့ ဆရာမက မလွှတ်ချင်ဘူး လောပန်းက သက်သာတဲ့နေရာကနေလုပ်ပါ မလုပ်နိုင်သေးဘူးဆို ပြန်လာ ခဲ့ဘာညာပြောမှအဆင်ပြေသွားတယ်

ကျင်းပြန်ဆင်းတော့ ဒီကောင်တွေ ဘိုင်ပင် ကျော်သွားပြီ ကျင်းတူးနေရင်းဘာရယ်မဟုတ် ဘိုင်ပင်အောက်ကို ကြည်မိသွားတယ် ဘိုင်ပင်အောက်မှာ ကျောက် အကြီးကြီး တလုံးရှီတယ် ။ကျွန်တော် က ကိုနိုင်ကိုမေးကြည့်တယ် ကျောက်နဲ့တော်တော်တူတယ်ပေါ့

ဟျောင့် ကုတုံး ငါမှော်ထဲမှာနေလာတာ ခုနှစ် နှစ်ရှိပြီ အဲလောက်တော့သိပါတယ်ကွ အဲဒါ တောင်ဆန်တုံးကြီးတဲ့ ဟုတ်လို့လားဗျာတော်တော်တူတယ်နော်ဆိုတော့ ဟျောင့် လျှောက်မလုပ်နဲ့နော် ကုတုံး သူ့အနောက်မှာ ခေါင်းပေါင်းတွေအများကြီးတဲ့

ကြုံတုန်း ကြွားရအုန်းမယ်ကျွန်တော့်ကို မိဘပေးတဲ့ အောင်ကြိုင်ဆိုတဲ့နံမည်ကစော်ဘွားချောင်မှာ ကျန်ခဲ့တယ်။

ဖြစ်ပုံကဒီလိုဗျ

အဲဒီတုန်းကလောပန်းမှော်ထဲခေါ်လာတဲ့အထဲကျွန်တော်ကအငယ်ဆုံး အစွာဆုံးဆိုတော့ လောပန်းက ချစ်ရှာပါတယ် သူများတွေ ပွိုင့်ဖိနပ်တရံ ကိုအလောတောင်းနေရတဲ့ အချိန်အသစ်လိုချင်ရင် အဟောင်းပြရတဲ့အချိန် ကျွန်တော် က တလနှစ်ရံသုံးရံရတယ် ရမှာပေါ့ ကျွန်တော် ကငယ်သေးတော့ ဖိနပ်ကမတော်ဘူး

ပထမကြီးတာကိုရတယ်အဆင်မပြေဘူး လောပန်ကိုသွားပြောတယ် နောက်တရံ ထပ်ထုတ်ပေးတယ် မရဘူး ချောင်းဆုံက သူ့ညီမဆိုင်မှာ သွားရှာဖို့ စာရေးပေးတယ် သွားရှာတယ် တော်တာမတွေ့ဘူး ခြေထောက်ကသိပ်ငယ်နေတာ အခုအသက်လေးဆယ်ကျော်ရောက်တာတောင် သုံးဆယ့်ရှစ်ပဲစီးလို့ရတယ်ဗျ စဉ်းစားတာကြည့်ပေါ့။

အဲဒါနဲ့ ပဲရတာယူလာခဲ့တယ် ချောင်းဆုံကို မှော်သစ်ကုန်ကနေသွားရတာလွယ်သလောက် ပြန်တက်ရတာမလွယ်ဘူး ကျွန်တော်စဉ်းစားတယ် ဖိနပ်ကသုံးရံ ရှိတယ်ဒါကအသစ် ငါဘာပဲစီစီး လောပန်းက မသိဘူး။လောလောဆယ် မောတယ် အရက်သောက်မယ်ပေါ့ ပွိုင့်ဖိနပ်အသစ်လေး ရသလောက်နဲ့ရောင်ပြီး အရက်သောက်ပလိုက်တယ် နှစ်ပတ်လောက်နေတော့ ခြေညှပ်ဖိနပ်လေးစီးပြီး လောပန်းရှေ့ကနေဖြတ်လျှောက်ပြီးကျင်းသွားတယ်

လောပန်း ကလှမ်းခေါ်တယ် ကလေးမင်းပွိုင့်ဖိနပ်ရောတဲ့ စီးလို့မရတော့ဘူးလွင့်ပစ်လိုက်ပြီ ဆိုတော့ ခနလေး ဆိုပြီး အခန်းထဲဝင် စာလေးတစောင်ကိုင်လာပြီးလာပေးတယ် အ့ကိုင်တို့နားသွားယူတဲ့ အ့ကိုင် ဆိုတာသူ့ညီမ ချောင်းဆုံက သူအကိုလက်မှတ်နဲ့စာသာပါလာရင်လိုချင်တာရတယ် အဲဒီဖိနပ်လည်းအရက်ဖြစ်သွားတာပဲ နောက်ဆိုနှစ်ပတ်တရံနုန်းလောက် သွားတောင်ပြီး အရက်သောက်ဖြစ်တယ် လောပန်းက သိတော့သိမှာပါ မပြောချင်လိုနေမှာပေါ့။

ဖိနပ်နဲ့အရက်သောက်နေရာက ဂွင်တခုပေါ်လာတယ် ကလေးမင်းဆံပင်ရှည်နေပြီ ကြည်မကောင်းတော့ဘူး ရော့ပိုက်ဆံယူသွား ညပ်လာခဲ့ တဲ့ ဆံပင်ညပ်ဖို့ပိုက်ဆံသုံးရမှာသိပ်နှမျောတာပဲ ဒါနဲ့ စျေးတန်းတက်ပြီးပလိပ်ဒါးဝယ်သူများကိုအကူညီတောင်းပြီး ကုတုံးရိတ်ခိုင်းလိုက် ပါတော့တယ် ဒါးဝယ်ပြီးပိုတဲ့ပိုက်ဆံ အရက်သောက်လာခဲ့တယ် ကုတုံးရိတ်လိုက်လိုလားမသိဘူး ဒီနေ့သောက်တာနဲနဲလေးများသွားတာကို အဆောင်မပြန်နိုင်တော့ဘူး

အဲဒီနေ့ကသောက်တာ အ့ဂျီး ရဲ့ဆိုင်မှာဗျ။ဖြစ်ချင်တော့ အဲဒီနေ့မှ အဆောင်မှာလောပန်းကိုယ်တိုင်လူစစ်တယ် အဆောင်မှုးက အောင်ကြိုင် ပြန်မလာကြောင်း တနေကုန်မတွေ့ကြောင်းပြောတော့ လောပန်းပြာသွားတယ်သူခေါ်လာတာလေ။တခုခုဖြစ်လို့မရဘူး တွေ့အောင်ရှာရမယ် ဆိုပြီးကျင်းခေါင်းတွေကိုထွက်ရှာခိုင်းပါတော့တယ်

စျေးတန်းကုန်းတက်လိုက်တာနဲ့အ့ဂျီးက တိုင်ပါတော့တယ် နင်တို့အဆောင်က ကလေး မူးပြီး ငါ့အခန်းထဲဝင်အိပ်နေတယ် အန်ထားတာလည်အများကြီးဆိုပဲ ၊ကျင်ခေါင်းတွေကိုယ်တိုင်ကျွန်တော့်ကိုထမ်းခေါ်ခဲ့ရပါတယ်။မိုးလင်းတော့လောပန်းကအဆောင်ထဲဆင်းလာပြီးကျွန်တော့ကိုလာကြည့်ပါတယ် သူပါမျက်လုံးပြူးသွားပါတယ် ကလေးမင်းကိုဆံပင်ညှပ်ခိုင်းတာ ဘယ်လိုဖြစ်တာလဲ တဲ့ ကျွန်တော် လည်းမညာပါဘူး ပိုက်ဆံ ကအရက်သောက်လို့ကုန်သွားတဲ့အကြောင်း ကုတုံးပဲရိတ် လိုက်ရကြောင်းပေါ့။ဒါနဲ့ မင်းဘယ်လောက်တောင်သောက်လို့ပြန်မလာနိုင်တာလဲတဲ့ သောက်တာကအရင်တိုင်းပဲလောပန်း

ကုတုံး ရိတ်လိုက်လို့ မထနိုင်တော့တာလို့ ပြောတော့ အေး မင်းကိုဒဏ်ပေးတဲ့အနေနဲ့ နံမည်ပြောင်းပြီ ဒီကောင်ကို ကုတုံးလို့ခေါ်ရမယ်ဆိုပြီး ကင်ပွန်း တပ်ပေးလိုက်တာ ဝှေခါမှာလေးနှစ် ကို အောင်ကြိုင်ဆိုတဲ့နံမည်ဘယ်သူမှမသိတော့ပဲ ကုတုံး ဆိုလို့ကတော့ မှော်သစ်ကုန်းအဝင်ကနေ မေးလိုက် ကလေးကအစသိတဲ့သူဖြစ်သွားပါတယ်။

ပြန်ဆက်ရရင် အဲဒီ ဘိုင်ပင်အောက်က အချိန်ခြောက်ရာလောက်ရှိတဲ့ကျောက်တုံးကြီးကို ကျွန်တော်စိတ်ထဲကျောက်ဖြစ်ရမယ် လို့အခိုင်မာတွေးထားတာ ထိုးချမယ်တကဲကဲပေါ့ အားလုံးကဝိုင်းတားကြတယ်လူကလည်းနဲနေတယ် ဒီအချိန်ဖြိုချလိုက်လို့ကျောက်ဖြစ်သွားရင်အကြောင်းမဟုတ်ဘူး မဖြစ်ခဲ့ရင် ပြန်ကျင်းရမယ့်ခေါင်းပေါင်းတွေကမနဲဘူးပေါ့။

ဒီလိုနဲ့ နှစ်လကျော်လာတဲ့အချိန် မတ်လဆန်းလောက်ပေါ့မိုးလေးစရွာလာပါတယ် လောပန်းကလည်းလူသစ်နှစ်ယောက်ထပ်ပို့တယ် မျောတိုက်ထားတဲ့ကျောက်ကျောကိုကုန်အောင်တူးဖို့ပါ။

ဆရာမရဲ့မောင်တန်ဂွင်းက ကျင်းအထိလာပို့ရင်း အဲဒီ ကျောက်တုံးကိုတွေ့သွားပါတယ် ကိုနိုင် ဒါကျောက်မဟုတ်ဘူးလားလို့ကချင်လိုမေးတော့ ကိုနိုင်က တန်ဂွင်းမင်းမြန်မြန်ပြန် ငါဆွဲထိုးမိမယ်ဆိုပြီးအော်လိုက်တော့တန်ဂွင်းလည်းကြောက်လိုသာပြန်ရတာ အဲဒီကျောက်တုံးကြီးကိုလှည့်ကြည့်လှည်ကြည့်နဲ့ ညနေကျင်းနားပြီး

တဲရောက်တယ်ဆိုရင်ပဲ မိုးကသဲသဲထန်ထန်ရွာပါတော့တယ်။နောက်နေ့မနက်မိုးလင်းတော့ကိုနိုင်က ကုတုံး ရေလာကွာ ညကမိုးများတယ်ကျင်းသွားကြည့်ရအောင်ဆိုပြီးခေါ်လို့လိုက်သွားကြည့်တော့ အဲဒီဘိုင်ပင်လဲသွားပြီး ကျွန်တော် ကျောက်လို့ယုံကြည်ထားတဲ့ကျောက်တုံးကြီးကကျင်းအဝတည့်တည့်မှာပြုတ်ကျနေပါပြီ။

အဆဲကြမ်းတဲ့ကိုနိုင်ကတော့ ထုံးစံအတိုင်း ကျောက်တုံးကြီးကိုဆဲပါတော့တယ် ဒီကောင်ကျလာလို့ အလုပ်ကိုရှူပ်တယ်ပေါ့ တဲပြန် ပြီးထမင်းစားရင်းအားလုံးကိုပြောပြတော့ မနေ့ကမှ ဝင်တဲ့နှစ်ယောက်မှာတယောက်ကထွက်မယ်ဖြစ်ရော လောပန်းအိမ်ကဟင်းပို့လာတာကြုံတာနဲ့ အကြောင်း စုံလောပန်းကိုစကားပါးလိုက်တယ် ပြိုထားတာအများကြီးဒီလူနဲ့မနိုင်ဘူး ဘယ်လိုလုပ်ရမလဲလို့မေးခိုင်းလိုက်တော့ တန်ဂွင်းကိုလာကြည့်ခိုင်းပါတယ်။

ဒီကောင်ကလည်းဒီကျောက်တုံးပဲ လာကြည့်နေတယ် ကျွန်တော့်နားကပ်ပြီး ကုတုံး ငါတော့ကျောက်ထင်တယ်မင်းရောတဲ့ ငါလည်းထင်တာပဲ ကိုနိုင်ကမဟုတ်ဘူးတဲ့ကွ သူ့ကိုသွားမပြောနဲ့အုန်း မင်းကိုဆဲနေလိမ်မယ်လို့ပြောလိုက်တော့ အေးပါဆိုပြီးပြန်သွားတယ် ခနနေတော့ လေပန်းအိမ်က အရပ်ပုပုနဲ့လူကောင်သေးသေး ပလောင်လူမျိုး ကျင်းသားသစ်တယောက်လာပို့တယ်။

ကျွန်တော် တို့ ကျင်ခေါင်းကြီးဆဲပါပြီ ဒီတခါလောပန်းကိုပါဆဲတာဗျ ဒီလောက်ပြိုထားတာ ခေါက်စားနေ့စားရှာမပေးဘူး ဒီကောင်ကို ဘာလုပ်ရမှာလဲ ဆိုပြီးတော့ပွဲကြမ်းပြီး ကုတုံး မင်းဒီကောင်ကို တဲလိုက်ပို့ ထမင်းချက်ခိုင်းထား မင်းပြန်လာ ခဲ့တဲ့ ကျွန်တော် ကျင်းပြန်ရောက်တော့ ကျွန်တော့်ကျောက်ကြီးတဝက်ပဲကျန်တော့တယ်

ကိုနိုင်ကျောက်ကွဲသွားတာလား လို့မေးတော့ ငါနဲ့ အိုက်ပီး သံဒိုင်နဲ့လိမ့်ပြီးတခြမ်းမြေစာပုံအောက်ချပလိုက်ပြီတဲ့ ကျွန်တော် လည်းသူစိတ်တိုနေတော့ ဘာမမပြောတော့ပဲ မြေစာ တွေဂေါ်တောင်းထဲထည့်လိုက်ထမ်းလိုက်ပေါ့။ထမင်းစား ချိန် တဲပြန်တော့ ပလောင်ကထမင်းမကျက်သေးဘူး ကိုနိုင် ဒေါသဖြစ်ပြီး ဆဲတာ ပြန်တောင်ပြောမပြတတ်တော့ဘူး။ဝိုင်းပြီးချက်ပြုတ်စားသောက်ပြီး ကျင်းပြန်လာတော့ မင်းတို့ လုပ်လုပ်နှင့်အုန်းငါပြန်လာခဲ့မယ်ဆိုပြီးကိုနိုင်မြေစာပုံအောက်ကိုဆင်းသွားပါတယ်။

ကိုနိုင်မရှိရင် ကျွန်တော် ကဆရာလုပ်ရတယ် ကိုအိုက်ပီးတို့ကထည့်ပေးကျွန်တော်ထမ်းမယ် မောင်ဝင်းမင်းကဂဲတွေတက်ရှင်းဆိုပြီးခိုင်းနေတုန်း ကိုနိုင်ပြန်တက်လာတယ် ခွက်တလုံးလည်းကိုင်လာတယ်။

ကုတုံး မင်းဟိုးအောက်မှာရေသွားခပ်တဲ့ ဘာလုပ်ဖို့တုန်းဆိုတော့ ကုတုံး မင်းမှန်တယ် ဒါကျောက်ကွတဲ့”။ကျွန်တော်လည်း ကိုအိုက်ပီး ရော့ အောက်မှာရေသွားခပ်လို့ပြန်ခိုင်း ပြီး မောင်ဝင်း ပြန်ဆင်းလာ သံဒိုင်လည်း ယူလာခဲ့ လို့ ပြောလိုက်တယ်။

မောင်ဝင်းကမယုံဘူး ဘာလုပ်ဖို့တုန်းတဲ့ မင်းတော်တော်စကားများတာပဲ ဒီဟာကျောက်ကွဆိုတော့ မယုံဘူး လောင်းမယ်ဆိုပြီးဆင်းလာပါတယ်။ကျွန်တော်လည်းသူ့ဆီ သံဒိုင်ယူပြီး ကျောက်ကို သုံးချက်ထိုးကြည့်လိုက်ပါတယ်။

သေချာပါပြီ ကျောက်အစစ်ပါ ကိုအိုက်ပီး ခပ်လာတဲ့ရေနဲ့ ကိုနိုင်နဲ့ကျွန်တော် ကျောက်ကိုဆေးကြည့် ကြပါတယ်။ကျောက်ရဲ့ယမ်းကအလုံးလေးတွေပါ မှော်ထဲကအခေါ်ကတော့ ရှဖြီး ခွန်လို့ခေါ်ပါတယ် ယမ်းထဲမှာ အကောင်းဆုံး တွေထဲကတခုပေါ့။ဒီယမ်းမျိုးက အသားတန်းကိုမှန်းစရာမလိုအောင်ကိုကောင်းပါတယ် သေချာသွားအောင် အပဲ့နေရာကိုလက်တဝါးစာကျော်ကျော်လောက်ဆေးကြည့်တော့မှ ကိုယ့်မျက်စိကိုယ်တောင်မယုံနိုင်အောင်ဖြစ်ရပါတယ်

ကိုနိုင် နဲ့ကျွန်တော်ပဲသိသေးတယ်မောင်ဝင်း အိုက်ပီး၊ နုလင်းနဲ့ပလောင်လေးတို့က မနက်ကမြေစာပုံမှာ လိမ့်ပြစ်လိုက်တဲ့ ကျောက်တခြမ်းကို သွားထမ်းနေကြတယ်။ကျောက်ကလျိုဖဲ့ပါ ဝလုတောင်တက်စပြုနေပြီ ဒတောင်မှဆေးလိုက်တဲ့လက်တဝါးသာသာလေးကအရည်ကွက်ကြီးဖြစ်နေတယ် ကျန်တဲ့ နေရာမဆေးရဲတော့ဘူးကိုနိုင်ကရွှံ့ပြန်သုတ်လိုက်ပါတော့တယ်။

ဟေ့မောင်ဝင်း မြန်မြန် လာစမ်း အရေးကြီးလို့ ကျင်းကိုလောပန်းသွားခေါ်လာ မြန်မြန် သွားနော် လောပန်းကို တိုးတိုးတိတ်တိတ် ပြော ကားပါရရင် ယူလာလို့ ပြောလိုက်လို့ ကိုနိုင် ကမှာနေတယ် ကျွန်တော် တို့က မနက်ကပဲ့သွားတဲ့အခြမ်းကိုသွားထမ်းပြီး ပြန်ဆက်ကြည့်ကြတယ် မရဘူးဗျ အပဲ့ခြင်းမတူဘူး ယမ်းလည်းတူကျောက်သားလည်တူရဲ့သားနဲ့ဆက်မရဘူး ဒါဆို အလယ်ကတပိုင်းရှိရမယ်ပေါ့ ရှာကြ ဘယ်လိုရှာရှာမတွေ့တော့ပါဘူး ဒီနေ့ အထိလည်းစဉ်းစားမရသေးပါဘူး သူ့ကိုကျွန်တော်မြင်တုန်းက တလုံးလုံးအပြည့်ပါ အခုရတာက အချိန် လေးရာလောက် တခြမ်း နှစ်ရာကျေလောက်တခြမ်းပါ။

ပြောချင်တာက ဒီကျောက်ကို ကျွန်တော်ခေါင်းပေါက်ပြီးမကြာခင် တွေ့တာ ဆိုတော့ သုံးလကျော်သွားပါပြီ။ဘာဖြစ်လို့ ပိုင်ဆိုင်ခွင့် နောက်ကျ ခဲ့ရသလေ ကျာက်တိုင်းမှာ ပိုင်ရှင် ရှိတယ်ဆိုတဲ့စကားကပဲမှန်နေသလားပလောင်လေးကို ထမင်းချက်ခိုင်းတုန်းက ကျောက်ပါလိုသိခဲ့ရင် ကျင်းဆင်းခွင့်မရသေးတဲ့ ပလောင်လေး ဝေစုမရနိုင်ပါဘူး သူကျင်းဆင်းတဲ့နေ့လည်ပိုင်းမှကျောက်မှန်းဘာလို့သိရတာလဲညောင်ကိုးပင် ကနတ်ကြီးတယ်ဆိုတာမှန်နေလားကျောက်တွေ့ပြီးမှထွက်သွား ရတဲ့ သုံးယောက်ကကော ကျောက်မောင်းတာများလား။

ဘာပဲပြောပြောသုံးလကျော်လောက် အဝကြည်ခွင့်ပေးထားပြီး မိုးရွာလို့ ကျင်းထဲခုန်ချလာပေးတဲ့ကျောက် ဒါတောင်မှ တခြမ်းကိုမြေစာပုံကိုသွားပြစ်ခံရတဲကျောက် မှော်ကြာကြီး ကိုနိုင် မျက်စိမှောက်ခဲ့တဲ့ကျောက် ကျင်းထဲကို နာရီပိုင်းလောက်ကလေးခြေချပြီး မှော်ကြာတွေနဲ့အတူတူပလောင်လူမျိုးလေးကိုဝေစုပေးခဲ့တဲ့ကျောက်။

အဒီကျောက် နဲ့ ကံတရားအကြောင်းကတော့ အနှစ်အစိတ်လောက်ရင်ထဲမှာ အမြစ်တွယ်နေခဲ့ပါတယ်

ဆက်ပါအုန်းမယ် အောင်ကြိုင်

Credit to original author AK